თურქეთის დედაქალაქ ანკარაში ვითარება უკიდურესად დაიძაბა. ქვეყნის მთავარი ოპოზიციური ძალის, „სახალხო რესპუბლიკური პარტიის“ (CHP) სათაო ოფისში სამართალდამცავები შეიჭრნენ. ოპერაცია მას შემდეგ დაიწყო, რაც სასამართლომ პარტიის ლიდერის, ოზგიურ ოზელის უფლებამოსილება ბათილად ცნო.

შტურმი და დაპირისპირება

სპეცრაზმმა პარტიის შენობასთან აღმართული ბარიკადები დაშალა. ტერიტორიაზე ცრემლსადენი გაზი გაუშვეს. გავრცელებულ კადრებში ჩანს, რომ შენობაში მყოფი პირები პოლიციას საგნებს ესვრიან, სამართალდამცავები კი მათ წყლის ჭავლით პასუხობენ.

თავად ოზგიურ ოზელმა სოციალურ ქსელში ვიდეომიმართვა გაავრცელა და მომხდარს „თავდასხმა“ უწოდა. ინციდენტის შემდეგ ოზელი შენობიდან გამოვიდა და მომხრეების თანხლებით პარლამენტისკენ გაემართა, სადაც განაცხადა, რომ პარტია ბრძოლას ქუჩებსა და მოედნებზე გააგრძელებს.

სასამართლოს სადავო გადაწყვეტილება

სასამართლოს გადაწყვეტილებით, პარტიის ხელმძღვანელად კვლავ ქემალ კილიჩდაროღლუ უნდა დაბრუნდეს. 77 წლის ვეტერანი პოლიტიკოსი, რომელმაც 2023 წლის საპრეზიდენტო არჩევნებში რეჯეფ თაიფ ერდოღანთან წააგო, მანამდე პარტიის ლიდერობიდან უკვე გადაყენებული იყო.

სასამართლომ გააუქმა 2025 წლის ქვედა ინსტანციის ვერდიქტი, რომელმაც პარტიის შიდა არჩევნებში ხმების მოსყიდვის ბრალდებები უსაფუძვლოდ მიიჩნია. ამ გადაწყვეტილებით, პარტიის მთელი აღმასრულებელი რგოლი უფლებამოსილებას კარგავს.

პოლიტიკური კონტექსტი

Human Rights Watch-ის შეფასებით, თურქეთის მთავრობა ოპოზიციის წინააღმდეგ „უხეშ ტაქტიკას“ იყენებს, რაც ქვეყანაში დემოკრატიულ პროცესებს აზიანებს. ოზგიურ ოზელი მმართველ პარტიას (AKP) პოლიტიკური კონკურენტების სრული განადგურების სტრატეგიაში ადანაშაულებს.

იუსტიციის მინისტრმა აკინ გურლეკმა კი განაცხადა, რომ სასამართლოს განაჩენი „მოქალაქეების ნდობას დემოკრატიის მიმართ განამტკიცებს“. ერდოღანი თურქეთს 2003 წლიდან ხელმძღვანელობს და მისი მმართველობის გახანგრძლივება კონსტიტუციურ ცვლილებებს ან ვადამდელ არჩევნებს საჭიროებს.