ინდოეთში ვირუსულად გავრცელებული სატირული გაერთიანება, Cockroach Janta Party (CJP), აცხადებს, რომ მათი ვებსაიტი მთავრობის მიერ არის დაბლოკილი. ინციდენტი ჯგუფის დაფუძნებიდან სულ რამდენიმე დღეში მოხდა.

ჯგუფის დამფუძნებელმა, აბჰიჯიტ დიპკემ, რომელიც ამერიკაში, ბოსტონის უნივერსიტეტში სწავლობს, სოციალურ ქსელ X-ზე დაწერა, რომ ხელისუფლებამ მათი „სიმბოლური ვებსაიტი გაანადგურა“. მან ირონიულად იკითხა, თუ რატომ არის სახელმწიფო ასე შეშინებული „ტარაკნებით“.

როგორ გაჩნდა „ტარაკნების პარტია“?

გაერთიანება გასართობი მიზნით შეიქმნა, მას შემდეგ, რაც გავრცელდა ინფორმაცია, რომ ინდოეთის უზენაესი სასამართლოს თავმჯდომარემ უმუშევარი ახალგაზრდები ტარაკნებს შეადარა. მოგვიანებით, მოსამართლემ განმარტა, რომ ის გულისხმობდა ადამიანებს „ყალბი და ფიქტიური დიპლომებით“ და არა ინდოეთის ახალგაზრდობას მთლიანობაში.

მიუხედავად ამისა, ჯგუფმა პოპულარობა სწრაფად მოიპოვა. CJP-ს სახელი ინდოეთის მმართველი პარტიის, Bharatiya Janata Party-ის (BJP) სატირული ვერსიაა. ჯგუფი საკუთარ თავს „ზარმაცებისა და უმუშევრების ხმას“ უწოდებს, ხოლო წევრობის კრიტერიუმად „პროფესიონალური წუწუნის უნარს“ ასახელებს.

ციფრული რეპრესიები თუ კანონის უზენაესობა?

ჯგუფის ოფიციალური გვერდი X-ზე, რომელსაც 200,000-ზე მეტი მიმდევარი ჰყავს, ინდოეთში მიუწვდომელია. მომხმარებლებს, რომლებიც გვერდზე შესვლას ცდილობენ, ხვდებათ შეტყობინება, რომ კონტენტი „სამართლებრივი მოთხოვნის საფუძველზე“ დაიბლოკა.

დიპკე ასევე აცხადებს, რომ როგორც მისი პირადი, ისე ჯგუფის Instagram-ის ანგარიშები გატეხილია. აღსანიშნავია, რომ CJP-ის Instagram-ს 22 მილიონზე მეტი მიმდევარი ჰყავს — ეს ორჯერ მეტია, ვიდრე მმართველი BJP-ის ოფიციალური გვერდის გამომწერების რაოდენობა.

ახალგაზრდების პროტესტი

ჯგუფის გავლენა ციფრული სივრციდან რეალურ ცხოვრებაშიც გადავიდა. ბოლო დღეებში ახალგაზრდა მოხალისეები ქუჩებში ტარაკნების კოსტიუმებში გამოწყობილები გამოჩნდნენ და დასუფთავების აქციებსა თუ საპროტესტო გამოსვლებს შეუერთდნენ. მათ გამოიყენეს ჰეშთეგი #MainBhiCockroach („მეც ტარაკანა ვარ“).

ექსპერტების შეფასებით, ჯგუფის წარმატება მიანიშნებს ინდოეთში არსებულ ღრმა უკმაყოფილებაზე ახალგაზრდებს შორის. ინდოეთი მსოფლიოში ერთ-ერთი ყველაზე ახალგაზრდა მოსახლეობის მქონე ქვეყანაა, სადაც 1.4 მილიარდი ადამიანიდან დაახლოებით ნახევარი 30 წლამდეა. თუმცა, ოფიციალურ პოლიტიკაში მათი ჩართულობა კვლავ შეზღუდული რჩება.