აშშ-ის მამაკაცთა ეროვნული საფეხბურთო ნაკრების მთავარმა მწვრთნელმა, მაურისიო პოჩეტინომ, 2026 წლის მსოფლიო ჩემპიონატისთვის 26-კაციანი შემადგენლობა დაამტკიცა. ოფიციალური განაცხადი, რომელსაც საფეხბურთო სამყარო მოუთმენლად ელოდა, ნიუ-იორკში დაგეგმილ ღონისძიებაზე გახდება საჯარო.

შემადგენლობაში ყველაზე ხმაურიანი სიახლე ჯოვანი რეინას დაბრუნებაა. მიუხედავად იმისა, რომ „ბორუსია მიონხენგლადბახის“ შემტევს დეკემბრის შემდეგ საკლუბო დონეზე სასტარტო შემადგენლობაში არ უთამაშია, პოჩეტინომ მისი კრეატიულობისა და არაპროგნოზირებადი თამაშის იმედად გადაწყვიტა, ის გუნდში ეხმო.

გუნდს მიღმა დარჩა „ლიონის“ ნახევარმცველი ტანერ ტესმანი. ფეხბურთელს კუნთის დაზიანება აწუხებს, პოჩეტინოს კი ტრავმირებული მოთამაშეების მიმართ მკაცრი და ფრთხილი მიდგომა აქვს. არგენტინელი სპეციალისტი მზად არ აღმოჩნდა რისკზე წასულიყო, რამაც ტესმანის განაცხადიდან ამოვარდნა გამოიწვია.

განაცხადში ადგილი დაიმსახურა „კლუბ ამერიკას“ შემტევმა ალეხანდრო ზენდეხასმა, რომელმაც მექსიკის ჩემპიონატის პლეი-ოფში ბრწყინვალე ფორმა აჩვენა. სწორედ ზენდეხასის ჩართვამ განაპირობა „რეალ სოლტ ლეიკის“ ნახევარმცველის, დიეგო ლუნას გუნდიდან გამოკლება, მიუხედავად იმისა, რომ ლუნა პოჩეტინოს ერთ-ერთ ფავორიტად მიიჩნეოდა.

გუნდის სტრუქტურა

პოჩეტინომ აქცენტი დაცვით ხაზზე გააკეთა, სადაც 10 ფეხბურთელი გამოიძახა. მათ შორისაა ჯო სკალი, რომელმაც „გლადბახში“ უნივერსალურობა დაამტკიცა და საჭიროების შემთხვევაში დაცვის სხვადასხვა პოზიციაზე თამაში შეუძლია.

ნახევარდაცვაში გუნდი შედარებით მოკრძალებულად გამოიყურება. ცენტრალურ ზონას ტაილერ ადამსი, ვესტონ მაკკენი, სებასტიან ბერჰალტერი და კრისტიან როლდანი გაუძღვებიან. საჭიროების შემთხვევაში, ამ პოზიციაზე „ბაიერის“ მოთამაშე მალიკ ტილმანიც გაიწევს.

საბოლოო სიის FIFA-ში დადასტურების ვადა 1 ივნისს იწურება. ამ დრომდე გუნდებში ცვლილებების შეტანა მხოლოდ სერიოზული ტრავმების ან ავადმყოფობის შემთხვევაშია შესაძლებელი. აშშ-ის ნაკრები მსოფლიო ჩემპიონატს 12 ივნისს, პარაგვაის წინააღმდეგ, ინგლვუდში გამართული მატჩით დაიწყებს.