ნიუ-იორკის მერ ზორან მამდანის ინიციატივამ, რომელიც ქალაქში მდიდრებისთვის ქონების გადასახადის ზრდას გულისხმობს, მოულოდნელი მხარდამჭერი იპოვა. Amazon-ის დამფუძნებელმა ჯეფ ბეზოსმა CNBC-სთან ინტერვიუში განაცხადა, რომ ე.წ. „პიე-და-ტერ“ (pied-à-terre) გადასახადი, რომელიც 5 მილიონ დოლარზე მეტი ღირებულების მეორე სახლების მფლობელებს შეეხება, ნიუ-იორკისთვის მისაღები ნაბიჯია.

ბეზოსი, რომელიც თავად ფლობს ნიუ-იორკში 5 მილიონ დოლარზე მეტი ღირებულების რამდენიმე უძრავ ქონებას, პირადად დაზარალდება ამ გადასახადით. მიუხედავად ამისა, მილიარდერმა ინიციატივა დადებითად შეაფასა.

თუმცა, ბეზოსის მხარდაჭერა მხოლოდ ამ გადასახადით შემოიფარგლა. მან მკაცრად გააკრიტიკა მერი მამდანის სოციალისტური რიტორიკა. განსაკუთრებული უკმაყოფილება გამოიწვია მერის მიერ სოციალურ ქსელში გავრცელებულმა ვიდეომ, სადაც ის ჰეჯ-ფონდების მენეჯერ კენ გრიფინის სახლთან დგას და მას „ბოროტმოქმედს“ უწოდებს.

„კენ გრიფინი არ არის ბოროტმოქმედი. მან არავის აწყენინა და არც ნიუ-იორკს აზიანებს. პირიქით, ეს ქმედება არასწორია და მისი საჭიროება არ არსებობდა“, — განაცხადა ბეზოსმა. ამ ვიდეომ ბიზნეს წრეებში დიდი უკმაყოფილება გამოიწვია, რის გამოც გრიფინმა ქალაქში დაგეგმილი 6 მილიარდი დოლარის ღირებულების საოფისე პროექტის შეჩერებითაც კი დაიმუქრა.

ბეზოსმა ასევე გააკრიტიკა მამდანის გეგმები საშემოსავლო გადასახადის ზრდასთან დაკავშირებით. მისი თქმით, ქალაქის საჯარო სკოლების დაფინანსება უკვე მაღალია, მაგრამ შედეგები არასაკმარისია. მან ხაზი გაუსვა, რომ გადასახადების ზრდა ვერ დაეხმარება საშუალო ფენას. ბეზოსის აზრით, აქცენტი დაბალი შემოსავლის მქონე პირების საგადასახადო ტვირთის შემსუბუქებაზე უნდა კეთდებოდეს.

„ნაცვლად იმისა, რომ სხვებს გადასახადები ვუმატოთ, მოდით, დავიწყოთ იმით, რომ კუინსში მცხოვრებმა 75 000 დოლარის შემოსავლის მქონე ექთანმა გადასახადები საერთოდ არ გადაიხადოს“, — აღნიშნა ბეზოსმა. მერმა მამდანმა ბეზოსის პოზიციას სოციალურ ქსელში მოკლედ უპასუხა და აღნიშნა, რომ კუინსში ბევრი მასწავლებელია, რომლებსაც ამ საკითხზე განსხვავებული აზრი აქვთ.

შეგახსენებთ, რომ ბეზოსს კუინსთან რთული ისტორია აკავშირებს. 2019 წელს Amazon-მა უარი თქვა იქ სათაო ოფისის აშენებაზე მას შემდეგ, რაც ადგილობრივმა პოლიტიკოსებმა პროექტისთვის გათვალისწინებული მილიარდობით დოლარის სუბსიდიები გააპროტესტეს.