დიდი ბრიტანეთის ჯანმრთელობის უსაფრთხოების სააგენტოს (UKHSA) ინფორმაციით, რედინგში, ბერკშირის საგრაფოში, მენინგიტის შემთხვევები დაფიქსირდა. ინფექციას ერთი სტუდენტის სიცოცხლე ემსხვერპლა, ორ პაციენტს კი ამჟამად სამედიცინო დახმარებას უწევენ.

უწყების განცხადებით, ეს შემთხვევები არ უკავშირდება მარტში კენტის საგრაფოში, ერთ-ერთ ღამის კლუბში დაფიქსირებულ მენინგიტ B-ს (MenB) აფეთქებას. ამჯერად მასობრივი ვაქცინაციის პროგრამის დაწყება არ იგეგმება, თუმცა დაინფიცირებულებთან კონტაქტში მყოფ პირებს პროფილაქტიკისთვის ანტიბიოტიკებს სთავაზობენ.

რა არის მენინგიტი?

მენინგიტი თავის ტვინისა და ზურგის ტვინის დამცავი გარსების ანთებაა. ის შეიძლება გამოწვეული იყოს როგორც ბაქტერიით, ისე ვირუსით. ბაქტერიული მენინგიტი იშვიათია, თუმცა ვირუსულთან შედარებით ბევრად უფრო მძიმე ფორმით მიმდინარეობს და შესაძლოა სეფსისამდე ან ტვინის დაზიანებამდე მიგვიყვანოს.

რედინგში დაფიქსირებული ერთ-ერთი შემთხვევა უკვე დადასტურდა, როგორც ბაქტერიული მენინგიტი B. ეს ინფექციის ყველაზე გავრცელებული და მძიმე ფორმაა დიდ ბრიტანეთში.

ვაქცინაცია და დაცვა

მენინგიტის თავიდან ასაცილებლად ბრიტანეთში ორი ძირითადი ვაქცინა გამოიყენება:

  • MenACWY ვაქცინა: იცავს ოთხი ტიპის ბაქტერიისგან (A, C, W და Y ჯგუფები). ის 14 წლის მოზარდებისთვისაა განკუთვნილი.
  • MenB ვაქცინა: იცავს B ჯგუფის ბაქტერიისგან. ის რეკომენდებულია ჩვილებისთვის, 8 კვირის ასაკიდან.

ექსპერტების თქმით, ვაქცინები არ შეიცავს ცოცხალ ბაქტერიებს, ამიტომ მათი საშუალებით დაავადების გავრცელება შეუძლებელია. აღსანიშნავია, რომ MenB ვაქცინა ბრიტანეთის იმუნიზაციის პროგრამაში 2015 წლის ივლისიდან ჩაერთო, შესაბამისად, 11 წელს გადაცილებულ მოზარდებსა და ახალგაზრდებს ეს აცრა არ გაუკეთებიათ.

გავრცელების გზები

მენინგიტი ვრცელდება ადამიანებს შორის მჭიდრო კონტაქტის შედეგად. ინფექცია გადაეცემა ნერწყვის, ხველის, ცემინების ან კოცნის დროს. ასევე, რისკს ზრდის საერთო სასმელის ან ელექტრონული სიგარეტის (vape) გამოყენება.

ჯანდაცვის სპეციალისტები მოუწოდებენ მოსახლეობას, სიმპტომების გამოვლენისთანავე მიმართონ გადაუდებელი დახმარების განყოფილებას. დროული მკურნალობა ინფექციის მართვისთვის გადამწყვეტია.