აზიის წყნარი ოკეანის რეგიონის ბაზრები კვირის დასაწყისს შერეული მოლოდინებით ხვდებიან. ინვესტორების ოპტიმიზმი ჰორმუზის სრუტის შესაძლო გახსნისა და ირანთან მიმდინარე დიპლომატიური პროცესების შესახებ გავრცელებულმა ცნობებმა განაპირობა.

აშშ-ის პრეზიდენტმა დონალდ ტრამპმა სოციალურ ქსელ Truth Social-ში განაცხადა, რომ ირანთან მოლაპარაკებები „ორგანიზებულ და კონსტრუქციულ რეჟიმში“ მიმდინარეობს. ტრამპმა საკუთარ წარმომადგენლებს მოუწოდა, არ იჩქარონ გარიგების გაფორმება, რადგან, მისი თქმით, დრო მათ მხარესაა.

ნავთობის ფასის ვარდნა

აღნიშნულმა განცხადებამ ნავთობის ბაზარზე მკვეთრი რეაქცია გამოიწვია. ნავთობის ფასი 5%-ზე მეტით შემცირდა, რაც ბოლო პერიოდში დაძაბული ფონის შემდეგ ბაზრისთვის გარკვეულ შვებას წარმოადგენს. შეგახსენებთ, რომ მანამდე, ირანული პორტების ბლოკადისა და ჰორმუზის სრუტის ფაქტობრივი ჩაკეტვის გამო, ენერგორესურსების ღირებულება მნიშვნელოვნად იყო გაზრდილი.

აზიის ბაზრების გახსნისას დაფიქსირებული მონაცემები ასეთია:

  • West Texas Intermediate-ის ივნისის ფიუჩერსები 5.07%-ით დაეცა და ბარელზე 91.70 დოლარს შეადგენს.
  • Brent-ის ტიპის ნავთობის ივლისის ფიუჩერსები 5.12%-ით შემცირდა და 98.24 დოლარი შეადგინა.

ბაზრების მდგომარეობა

იაპონური Nikkei 225-ის შემთხვევაში ზრდის მოლოდინია, რადგან ჩიკაგოს ფიუჩერსული კონტრაქტები წინა დახურვის მაჩვენებელს აღემატება. ავსტრალიაში S&P/ASX 200-ის ინდექსი მცირედით დაბალი მაჩვენებლით ვაჭრობს.

აღსანიშნავია, რომ ჰონგ-კონგისა და სამხრეთ კორეის ბირჟები დღეს საჯარო უქმეების გამო დახურულია. ასევე, აშშ-ის ბაზრები არ მუშაობს Memorial Day-ს დღესასწაულის გამო.

პარასკევს, აშშ-ის ბაზრებმა დადებითი დინამიკით დაასრულეს ვაჭრობა. Dow Jones-მა 0.58%-იანი ზრდა აჩვენა და რეკორდულ ნიშნულზე დაიხურა, ზრდა დაფიქსირდა S&P 500-სა და Nasdaq-ის ინდექსებზეც.