ბრიტანული რეალითი შოუ Married at First Sight UK სერიოზული სკანდალის ეპიცენტრში მოექცა. პროექტის სამმა მონაწილემ არხ Channel 4-სა და საპროდიუსერო კომპანია CPL-ს გაუპატიურებისა და სექსუალური ძალადობის ბრალდებები წაუყენა. ეს ფაქტი კითხვის ნიშნის ქვეშ აყენებს რეალითი ტელევიზიების უსაფრთხოების სტანდარტებს.

პარლამენტის ჩართულობა და გამოძიება

ბრიტანეთის კულტურის, მედიისა და სპორტის დეპარტამენტმა უკვე განაცხადა, რომ ბრალდებები აუცილებლად უნდა იქნას გამოძიებული. ამასთან, მარეგულირებელმა ორგანომ Ofcom-მა შესაძლოა რეალითი შოუებში მონაწილეთა დაცვის მექანიზმები გადახედოს.

ყოფილი უსაფრთხოების მინისტრი ჯეს ფილიპსი აღნიშნავს, რომ მსგავსი ფორმატის შოუებში თავისუფალი ნებისა და თანხმობის უზრუნველყოფა უკიდურესად რთულია. მისი თქმით, მონაწილეები კონტრაქტებითა და საზოგადოებრივი მოლოდინებით არიან შეზღუდულნი, რაც დაცვის ბარიერებს ამცირებს.

პოზიციები: არხი vs მონაწილეები

Channel 4-ის ხელმძღვანელობა აცხადებს, რომ მათ თითოეულ შემთხვევაზე რეაგირება დროულად მოახდინეს, არსებული ინფორმაციის საფუძველზე. არხი კატეგორიულად უარყოფს ბრალდებებს, თითქოს მათ უგულებელყვეს მონაწილეთა უსაფრთხოება. კომპანია CPL-ის განცხადებით კი, მათი უსაფრთხოების ოქმები ინდუსტრიაში „ოქროს სტანდარტად“ ითვლება.

თუმცა, კრიტიკოსები სვამენ კითხვას: იყო თუ არა შოუს ფორმატის შეცვლა 2021 წელს (რამაც პროექტი დოკუმენტური სტილიდან მეტად გასართობი, ალკოჰოლით გაჯერებული წვეულებებისკენ მიმართა) უსაფრთხოების რისკების ზრდის მიზეზი? პარლამენტარ კეროლაინ დინეინეჯის თქმით, როდესაც უცნობ ადამიანებს უწევთ ერთად ცხოვრება და საწოლის გაყოფა, ეს „უბედური შემთხვევის მოლოდინს“ ჰგავს.

მომავალი გაურკვეველია

შოუს მე-11 სეზონი უკვე გადაღებულია და შემოდგომაზე უნდა გავიდეს ეთერში. თუმცა, მისი მომავალი კითხვის ნიშნის ქვეშაა, განსაკუთრებით მას შემდეგ, რაც პროექტის მთავარმა სპონსორმა თანამშრომლობა შეაჩერა.

Channel 4-ისთვის ეს სკანდალი ფინანსურად მძიმე პერიოდს ემთხვევა. სარეკლამო შემოსავლების კლებამ და გასულ წელს დაფიქსირებულმა 52 მილიონიანი დეფიციტმა არხი რთულ ვითარებაში ჩააყენა. რეალითი შოუ, რომელიც მილიონობით მაყურებელს იზიდავს, არხის შემოსავლების ერთ-ერთი მთავარი წყაროა, თუმცა რეპუტაციული ზიანი შესაძლოა გაცილებით ძვირი დაუჯდეს.