ტომ ლის მმართველობაში მყოფი BitMine, რომელიც ეთერიუმის (ETH) ყველაზე დიდი საჯარო მფლობელია, რთულ პერიოდს გადის. კომპანიის მიერ დაგროვილი აქტივების ღირებულება ბაზარზე მიმდინარე მკვეთრი ვარდნის გამო 7.3 მილიარდი დოლარით შემცირდა.

BitMine-მა ეთერიუმის შესყიდვა 2025 წლის ივლისში დაიწყო. მაშინ კომპანიამ 250 მილიონი დოლარის კერძო განთავსება განახორციელა და პირველ ეტაპზე 163,142 ETH შეიძინა. მიუხედავად ფასების კლებისა, კომპანიამ სტრატეგია არ შეცვალა და აქტივების დაგროვება განაგრძო.

მზარდი ზარალი და სარისკო სტრატეგია

დღეის მდგომარეობით, BitMine 5.28 მილიონ ETH-ს ფლობს, რაც ეთერიუმის მთლიანი მიწოდების დაახლოებით 4.37%-ს შეადგენს. კომპანიის საშუალო შესყიდვის ფასი 3,513 დოლარს შეადგენს, რაც ამჟამინდელი ბაზრული მდგომარეობის გათვალისწინებით უზარმაზარ „ქაღალდის ზარალს“ (unrealized losses) ნიშნავს.

ტექნიკური ანალიზი ამჟამად პესიმისტურია. ეთერიუმი ოქტომბრის პიკიდან, რომელიც 4,955 დოლარს შეადგენდა, 57%-ით არის გაუფასურებული. თუ ბაზარზე არსებული ნეგატიური ტენდენცია გაგრძელდა, ფასმა შესაძლოა 1,600 დოლარის ნიშნულამდე დაიწიოს. ასეთ შემთხვევაში, BitMine-ის ზარალმა შესაძლოა 10 მილიარდ დოლარს გადააჭარბოს.

რა გავლენას ახდენს ბაზარი?

კრიპტოვალუტის ფასზე ზეწოლას რამდენიმე ფაქტორი ახდენს:

  • ეთერიუმის ETF-ებიდან კაპიტალის გადინება;
  • Ethereum Foundation-ის წევრების წასვლა;
  • სოციალურ მედიაში ინვესტორთა ნდობის მკვეთრი ვარდნა;
  • ბაზრის წილის შემცირება სხვა ალტკოინებთან შედარებით.

ტომ ლი კვლავ ინარჩუნებს პოზიტიურ მოლოდინს. თებერვალში მან განაცხადა, რომ 50%-იანი ვარდნა ხშირად ყიდვის კარგ შესაძლებლობას წარმოადგენს. კომპანიამ მაისში შესყიდვების ტემპი შეანელა, თუმცა დეკემბრამდე ეთერიუმის მიწოდების 5%-ის ფლობის მიზანი კვლავ ძალაშია.